Act 6 | NdeIBE | STEP | Ngalezozinsuku inani labafundi lisanda, abaJuda besiGiriki ababephakathi kwabo bakhonona kulabo ababekhuluma isi-Aramu ngokuba abafelokazi babo babengananzwa nxa kusabiwa ukudla ngezinsuku zonke.

Acts 6

Ukukhethwa Kwaba Yisikhombisa

1 Ngalezozinsuku inani labafundi lisanda, abaJuda besiGiriki ababephakathi kwabo bakhonona kulabo ababekhuluma isi-Aramu ngokuba abafelokazi babo babengananzwa nxa kusabiwa ukudla ngezinsuku zonke. 2 Yikho abaLitshumi Lambili bahlanganisa bonke abafundi ndawonye bathi, “Kuyabe kungalunganga kithi ukuthi siyekethise ukutshumayela ilizwi likaNkulunkulu silibale ngokulungiselana ukudla. 3 Bazalwane, khethani amadoda ayisikhombisa phakathi kwenu aziwayo ukuthi agcwele uMoya lokuhlakanipha. Umlandu lo sizawuqhubela bona 4 thina siqinise ukukhuleka lokutshumayela ilizwi.”

5 Umbono lo walithabisa ixuku lonke. Bakhetha uStefane, indoda eyayigcwele ukukholwa loMoya oNgcwele; kanye loFiliphu, loPhrokhuru, loNikhanori, loThimoni, loPhamena loNikhola wase-Antiyokhi, ikholwa lenkonzo yesiJuda. 6 Amadoda la ethulwa kubaphostoli bakhuleka bababeka izandla.

7 Ngakho ilizwi likaNkulunkulu lamemetheka. Inani labafundi eJerusalema landa ngokuphangisa, kwathi lenani elikhulu labaphristi layilandela inkolo.

UStefane Uyabotshwa

8 Kwathi uStefane, indoda eyayigcwele umusa kaNkulunkulu, lamandla, yenza izimanga lemimangaliso phakathi kwabantu. 9 Kwasekuvela umona usuka kumalunga eSinagogi yabaKhululiweyo (njengokubizwa kwakhona) – benga-baJuda baseKhureni le-Alekizandriya kanye lasemikhonweni yaseKhilikhiya le-Asiya. Abantu laba basuka basebephikisana loStefane,

10 kodwa behluleka ukumelana lenhlakanipho yakhe kumbe uMoya ayekhuluma ngawo.

11 Basebefunza abanye abantu amazwi ngasese ukuthi bathi, “Simzwile uStefane ekhuluma amazwi ahlambaza uMosi kanye loNkulunkulu.”

12 Ngaleyondlela badungulula abantu labadala kanye labafundisi bomthetho. Bambopha uStefane bamletha phambi kweSanihedrini. 13 Baveza ofakazi bamanga abafakaza bathi, “Indoda le kayikhawuli ukukhuluma kubi ngendawo engcwele langomthetho. 14 Ngoba sesimuzwe esithi uJesu lo waseNazaretha uzayibhidliza indawo le njalo aguqule imikhubo uMosi asipha yona.”

15 Bonke ababehlezi phakathi kweSanihedrini bamnanzelela uStefane babona ukuthi ubuso bakhe babufana lobuso bengilosi.